1319 Prěnje pisomne naspomnjenje Wotrowa: Dietrich z Haugwitza předa 4 talenty danje fararjej Eberhardej, kotryž je hnydom klóštrje w Pančicach dari
1758 Załoženje Wotrowskeje wosady přez serbskeho biskopa Jakuba Jana Józefa Wóskeho z Bärenstama
1768–1772 Twar cyrkwje
1772 Poswjećenje cyrkwje swj. Bena
1814 Prěni raz jěchaja Wotrowčenjo jako křižerjo
1815 Farar Sommer započa pisać wosadnu chroniku; zatwar prěnich pišćelow
1821 Křižowy puć so na kěrchowsku murju staji, tak mjenowane „kapałki“ přewostaji w lěće 1818 Jakub Lajnert (młynk w klóštrje) Wotrowskej cyrkwi; poswjećenje 1822
1858 Šindźelata třěcha farskeho domu wuměni so z třěšnymi cyhelemi
1861 Dźělenje hamta zwóńka wot wučerskeho městna
1865 Nowoměšnik Jurij Łušćanski (pozdźiši biskop) swjeći swoju primicu
1896/97 Cyrkej dóstanje nowe třěšne cyhele
1903–1909 Jakub Bart-Ćišinski zastupuje husćišo chorowateho fararja Herrmanna; na swójske přeće bu Ćišinski we Wotrowje pochowany
1910 Farar Jakub Herrmann dari cyrkwi barbojte wokno
1914 decembra 1914 swjeći so prěni raz we cyrkwi elektriska swěca.
1920 Załoženje serbskeho towarstwa katolskich młodźencow; poswjećenje pomnika na Kopcach
1923 Ponowjenje hłowneho wołtarja a nabočnych wołtarjow; wuporjedźenje cyrkwinskeje wěže; załoženje towarstwa katolskich knježnow
1931 Pawoł Brycka natwari kamjentnu kapałku na Lipicy
1933/34 Přitwar wołtarnišća cyrkwje a přitwar noweje sakristije na južnej stronje
1940 Na přikaz nacionalsocialistow a ordinariata wopušći farar Mikławš Just Wotrow, wostanje pak dale oficialnje farar Wotrowskeje wosady; wón so nawróći w juliju 1945
1941 Prěni raz wotměwaja so tak mjenowane „pólske Bože słužby“ (němske Bože mšě za polskich nućenych dźěłaćerjow)
Apryl 1945 Wójnska fronta wokoło Wotrowa; cyrkej a fara so přez granaty zlochka wobškodźištej
1946 Cyril Nawka přićehnje do Wotrowa, pod jeho nawodom nasta cyrkwinski chór
1948 Njewšědny dwójny pohrjeb: farar Jan Cyž-Hajničanski a arcyměšnik Pawoł Šołta-Lubijski – wobaj pochadźeštaj z Wotrowskeje wosady
1961 Elektriska připrawa za zwonjenje zwonow so zatwari; rozšěrjenje kěrchowa na zapadnu stronu
1963 Na wuchodnej stronje kěrchowa da farar Just na swisle pódlanskeho twarjenja susoda sgrafito trubjaceho jandźela připrawić
1964 Poswjećenje noweju zwonow
1964-1971 Farar Grofa da wołtarnišćo po normach 2. Vatikanskeho koncila přetwarić, wołtar ponowić, wołtarne blido wot retabla wotsunyć a kehelki wottwarić; cyrkwina wěža dóstanje nowu koporowu třěchu
1969 Poswjećenje noweho narowneho pomnika za Jakuba Barta-Ćišinskeho
1971 Bože ćěło: wotnětka nastaji so jenož hišće jedyn wonkowny wołtar we wsy
1972 Při składnosći 200-lětneho wobstaća Wotrowskeje cyrkwje wuda farar Měrćin Salowski brošuru „200 lět Wotrowska wosada“, kotruž napisa farar Rudolf Kilank
1972–1977 Nutřkowne ponowjenje cyrkwje; 1973/74 ponowjenje farskeho domu; 1976 twar ćěłownje (přez gmejnu); 1977 wonkowny wobmjetk cyrkwje so ponowi
1994 Poswjećenje nowych pišćelow
1995 Ponowjenje farskeho domu
1997 Wosadny swjedźeń při składnosći 225-lětneho poswjećenja wosadneje cyrkwje
2001 Wonkowne ponowjenje cyrkwje; serbscy rěčacy japanski germanist Goro Christoph Kimura je z hosćom we Wotrowje a bydli na farje. Wón hromadźi material za swoje doktorske dźěło. Wuslědki wozjewi w mjezynarodnym časopisu „International Journal of Sociology of Language“ (2015) w němskej rěči; wozjewjenje w serbskej rěči sćěhuje w Lětopisu (2016/1)
2003 Nutřkowne ponowjenje cyrkwje
2004 Poswjećenje pomnika při puću do Pančic k wopomnjeću na wopory wobchadnych njezbožow; z wotchadom fararja Kilanka na wuměnk (w oktobrje) wotpadnu Bože mšě sobotu wječor, rańše kemše wotydźeń su jenož hišće wutoru
2006 Při składnosći wjetšeho wosadneho swjedźenja wuda so kniha „Wotrow – něhdy a dźensa“
2008 Zatwar noweje klětki, mišterski kruch Mariana Wjeńki
2009 Poswjećenje chorhoje Wotrowskeje wohnjoweje wobory swj. Bena
2010 Wot 1. septembra je Chróšćanski farar Clemens Hrjehor administrator (do 31.8.2015); z wotchadom fararja Dawidowskeho do Reichenbach (w Vogtlandskej) wotpadnu njedźelske rańše kemše
2013 Poswjećenje nabočneho wołtarja, kotryž bě Marian Wjeńk po starych fotografijach zhotowił
2014 Při składnosći 200-lětneho jubileja křižerskeho procesiona nastajichu so čestne wrota; biskop dr. Heiner Koch powita křižerjow po jich nawróće
2015 Wot 1. septembra je Chróšćanski farar Měrćin Deleńk administrator
2019 Přetwar farskeho domu, zarjadowanje separatneho bydlenja
2022 Ponowjenje cyrkwje (nutřka); wosadny swjedźeń składnostnje 250. róčnicy załoženja wosady; film wo swjedźenskim ćahu nastanje; kniha wo swjedźenju „Herbstwo Wóskeho – Woskys Erbe“ wuńdźe