Cyrkwinske a wosadne žiwjenje je w Serbach wusko ze serbskej rěču a kulturu zwjazane, štož so mjez druhim wotbłyšćuje w nošenju narodneje drasty při wosebitych składnosćach. W běhu lětdźesatkow nastachu wšelake nałožki, kotrež su tež dźensa kruty wobstatk wosadneho žiwjenja.
Swj. Marja a swj. Józef pytataj hospodu
W adwenće pěstujemy we Wotrowje stary nałožk. Holcy mjez 11 a 14 lět noša postawje swj. Marije a swj. Józefa po wsy. Dźewjeć dnjow do hód pytataj za hospodu, a to we 18 swójbach. Mamy we wsy dwoje postawy, dokelž dźěli so wjeska do Delnjeho a Hornjeho židowa.
Martrowny tydźeń
Zeleny štwórtk nawječor zwonja zwony posledni raz do jutrowneho zrowastanjenja, potom wone hač do Božeje mšě w jutrownej nocy mjelča. Wulki pjatk a Swjatu sobotu chodźa hólcy (do 8. lětnika) klepotajo po wsy wot jednoho swjateho křiža k druhemu a so před nim stejo Jandźelknjeza modla.
Wulki pjatk syda za nich na farje k wobjedu bozankowa poliwka. Sobotu jědźa tam tykanc.
Ćichu sobotu pěstuja młodostne holcy tak mjenowane křižespěwanje. Wone zetkaja so popołdnju k zhromadnemu spěwanju před někotrymi swjatymi křižemi we wsy.
Jutry
W lěće 1814 jěchaše prěni raz křižerski procesion Wotrowskeje wosady, tehdy zawěsće jenož wokoło polow, zo bychu Boha prosyli wo škit a bohate žně. Hač do dźensnišeho je so tuta starodawna tradicija we Wotrowje wobchowała. Kóžde lěto jěchaja do druheho směra: jónu do Kašec, jónu do Žuric, jónu do Kanec, do Krěpjec abo Jawory. Puć tam a dompuć njejstej zwjetša samsnej.
W 12 hodź. zetkawaja so křižerjo při cyrkwi a wotjěchaja do susodneje Njebjelčanskeje wosady. Partnerstwo z Njebjelčicami nasta w běhu prěnjeje połojcy 19. lětstotka. Tež we wójnskim času jěchachu křižerjo do susodneje wosady.
Wotrowske procesiony běchu hižo přeco po ličbje skromne, dokelž bě tu mało konjow. Tuž dyrbjachu sej konje požčeć. Dźensa jězdźa křižerjo samo hač do Zebnic, zo bychu sej konje wupožčili. Prjedy jěchaše 20 do 30 porow, druhdy samo mjenje; dźensa je jich wokoło 60 porow.
Procesiony
Swjateho Marka je procesion na Kopcy, dalše procesiony wjedu 1. meje na Lipicu k tamnišej Bryckec kapałce, na próstwowych dnjach do Kanec, do směra Krěpjec a po pólnym puću do směra Pančic.
Wosebje swjatočne su procesiony na swjedźenju Božeho ćěła, hdyž sej holcy družču drastu a wjele žonow serbsku drastu woblekaja.
Swjateho Měrćina
11. nowembra, na dnju swj. Měrćina, je kaž w druhich serbskich katolskich wsach tež we Wotrowje z wašnjom, zo chodźa předšulske a šulske dźěći w małych skupinach po wsy a proša wo małe dary, wosebje słódkosće. Legenda swj. Měrćina předstaja so druhdy tež jako dźiwadłowa hra.